(يجيني يوم وعطيها)
انا ما اخطيت في حقك ولكن الكلام عتاب
أعاتب والعتب كلمة تفسرها معانيها
اعاتب واحسب بهرجي الا مني حكيت حساب
وكلمه يستحي منها لساني يبتدى فيها
واذا انت من العتب تزعل علينا وابتصك الباب
ترى ما نيب قاصدها ولاني فيك ناويها
ولا ودى على الفرقا وقلبي داخلي مرتاب
اشوف ان الهوى خدعة واشوف القلب راضيها
واشوف ان الهوى فرقا مواليف وعناد احباب
واشوف ان الجفا خطوة ولاني قادر اخطيها
وقلبي لو عشق يخلص ولو طالت عليه رقاب
وتشهد له دروب الحب حاضرها وماضيها
عشقنا والهوى حسرة،مشينا ولاأمل كذا
بدينا نانبني منها قليل من بلاويها
عرفت الحب من عمري صغير بالغرام وشاب
وقلبي للحبيب اكبر من الدنيا وما فيها
صحيح انى نويت ابعد ولكن الهوى غلاب
وهي رحلة بديت بها ولا ادري كيف بنهيها
تحريتك شروق الشمس وشفتك للشروق غياب
ولا اضنك تبيع العشره اللي كنت شاريها
بقى لي بالهوى نظرة وتغريبة ودمع اهداب
وقصة بترك لسانك على العذال يرويها
واناجي باقي حروفي وبألف للفراق كتاب
قصايد تملي اوراقي ارددها واغنيها
واذا مرتني الذكرى وجرحي بالحشا ما طاب
بتبعدني وتدنيني وببعدها وابدنيها
وانا عيب علي اشكي من الدنيا بدون اسباب
مدامي ما خذ منها يجيني يوم واعطيها
--------------------------------------------------------------------------------
(كحيلان)
يا شعر تبقى في نظرهم كحيلان
وبنظرتي تسوى عيال الحمايل
حنا اثنين اخوان، واكثر من اخوان
لو ما تجمّعنا عروق وسلايل
لو نختلف باسماء وعروق واوطان
يبقى التشابه بيننا بالخصايل
وانا ليا منّي نويت اكسب انسان
أسعى له بكلّ السبل والوسايل
أعرف كيف اردّ الاحسان باحسان
وكيف احصد بذور الفضايل فضايل
عايش زمن عاصرت به كل الازمان
ما اعيل بسّ اكسر ثلاثين عايل
أكسب عدو، واحرق به قلوب عدوان
أشعل فتيله، بسّ اطفّي فتايل
إن خفت ضعف..اخاف من ضعف الايمان
وان عفت حمل..اعاف حمل الجمايل
حامد زيد
--------------------------------------------------------------------------------
(الكذب خيبة)
روحي وهالمرّه خلاص لاتردين
هذا الفراق وروحةٍ دون رده
الكذب خيبه ماعرفتي تحبين
ما أنتي من إلى يستحق المودّه
ماتعرفين الحب والعطف واللّين
ولا عاد في قلبي على الحب شده
حامد زيد
--------------------------------------------------------------------------------
(صوت الفناجيل)
ياحبيبي لاتواعد مواعيد وتغيب
دامك تقول المواعيد من غير شهوه
والله إني من عرفتك وسميتك حبيب
أسمع بصوت الفناجيل وماشفت قهوه
حامد زيد
--------------------------------------------------------------------------------
(ملعون ابو العشق)
ملعون أبو العشق دام العشق دلّعها
لاصارت البنت تامرنا وتنهينا
تجزم على الراي والكلمه وتقطعها
وحنا الرياجيل لارحنا ولا جينا
حامد زيد
................................................................................
.....................
(يقولون ما لا يفعلون)
ما بقى الا سود الايام تحرمك الرقاد
كيف الاوهام اتجرأ اتسريك مغبون
من متى تجزع من الدمع و تخاف البعاد؟
من متى تقفي بك ظنون و تجيبك ظنون؟
صرت تاخذ كذبتي صدق و مزاحي وكاد
لو بقول اني بخونك تحسب اني بخون
ما تعرف ان كل شاعر يهيم بكل واد؟
و انهم دايم يقولون ما لا يفعلون؟
ابك انا لا قلت ابنساك و انكرت الوداد
و الله اني مانسيتك ولاهم يحزنون
من جزع من صفعة الشمس يطمع بالبراد
و من فقد وجهاته الخمس يلقى بك ركون
اعتبرها هفوة انسان او كبوة جواد
لو بتسمح فانت غالي و لو تجرح تمون
عد صداتك مروة و طعناتك ضماد
خلهن لاراحن طعون و لا ردن طعون
خنجرك يستاهل الطعن و متوني شداد
و منك يازين الخناجر و يا بخت المتون
ردلي حنية المزح باحساس الجماد
خلنا واحد يجي صلب و الثاني حنون
موت فيني و اندفن فيك بثياب الحداد
و ان حييت أموت لرضاك و احيا بك بهون
مره ارقد بالكفن و انت ترقد بالمهاد
و مرة ارقد بالمهد و انت ترقد بالكفون
ادري ان شجونك شجون و اعنادك عناد
و البلا ان عنادك عناد و شجونك شجون
ربك اللي سخرك لي تقود و ما تقاد
و الله الخالق و لله في خلقه شؤون
ازرع ضلوعي من رضاك و ابشر بالحصاد
لعنبو من جيت ترضيه و ترد محزون
بس تسوالك بلد ؟ قول تسوالك بلاد
انت كل العالم بكون و لحالك بكون
مابعد محبتك حب و مرادك مراد
غير كونك سيد حشاي تدري من تكون ؟
نعمتين اختصوا الخلق من جود الجواد
كافل الأرزاق من حيث مالا تعلمون
البنون و نعمة المال في عيون العباد
زينة الدنيا بلا شك في كل العيون
مثل زينة دنيتي بس عندي شي زاد
من عرفتك صاروا المال و انت و البنون
انتشي بك نشوة التيه لعناق الرشاد
و افزع الك فزعة القرم لشهاق الزبون
و احصنك تحصين الأرزاق عن درب الفساد
و اعشقك عشق المظاليم لفراق السجون
لو تزيد الشوق جمرة تحولني رماد
لو يزيد العشق شعرة بوصل للجنون
خل هقواتك كبيرة و نظراتك بعاد
كانك انت بكبرك تهون من اللي ما يهون ؟
ازعلك و ارهن حياتي تحت رحمة زناد
تهبى لا و الله الا انت و الموت تهبون
عاد اذا ما ارضاك هرجي و لا اللي قلت فاد
اننا لله و انا اليه راجعون
و انت باكر بتعرف على ناس جداد
و الكلام يجيك من كل شكل و كل لون
لا تحسب ان كل كلمة بتسمعها وكاد
و لا تصدق هرج شاعر و تخدعك الظنون
دايم اعرف كل شاعر يهيم بكل واد
و ان هم دايم يقولون ما لا يفعلون
حتى انا اللي قلت اعشقك و ما اطيق البعاد
يمكن اطلع ماعشقتك .. و لا هم يحزنون
حامد زيد
--------------------------------------------------------------------------------
(الحلم )
بوقت من البطا و بليل تترقص شياطينه
بعد شفت الضيا ينزع من ثياب المسا ثلثين
تحايلت المنام اللي مثل بيتك تمرينه
و انا اللي من تفارقنا و أنا ما غمضت لي عين
غريبة كل حلم يمر في رقادي تزورينه
و الاغرب كيف أحلم الحلم و ارجع و احلمه بعدين
قبل يومين شفتك بالمنام و قمت من حينه
و نمت أمس و أرجع نفس المنام اللي قبل يومين
أنا اللي قبل اسافر شلت قلبي من شرايينه
تركته في يدك مثل الأمانه و احفظيها زين
ترى حفظ الأمانه دين مجبورة تردينه
أجل ما فيه أحد قد قال لك حفظ الأمانة دين
مرد المقفي بيلفي و يستوفي و توفينه
بعد ليله ثلاثه أربعه عشره شهر شهرين
إذا انتي ما انتي بقد الكلام اللي تقولينه
حرام استامنك حاجة و إذا جيت اطلبك تنسين
تخونين و تبين أرضى و احد يرضى تخونينه
أنا لاجيت أخونك مع حبيبة ثانيه ترضين
من أول مارجعت من السفر ماشفت لك بينه
و أنا اللي كنت أحسبك قبل ادوس ارض المطار تجين
تكونين أنتي أول شخص عيني تحتضن عينه
وكنت أتخيلك من زود فرحة رجعتي تبكين
و أشوف بدمعتك حكيك و أعرفه قبل تحكينه
و اجيب أحلى من اللي بتحكينه و أتركك تحكين
تقولين: الوطن نور و أقول: بنور مضوينه
تقولي لي: غديت أحلى و أقول: عيونك الحلوين
كلام نام بشفاهك و خفتي لا تصحينه
ذخرتيه لغرام للي ينام و يترك تصحين
تغانمتي غيابي لين رجحتي موازينه
تعلم من يدك لمس الكفوف و علمك تجفين
و ليتك لاقيه به شي فيني ما تلاقينه
مهو بغرور لكن خابرك مالك أمل تلقين
تغافلك بغلا و الا الحلا مهوب من زينه
تزينه الصور بس الصحيح ابن الحلال زوين
و أنا ماني بنقاص عنه يوم أنك تبدينه
نصيبي هو نصيبي لو يسددها من الصوبين
قنوع بمظهري و السم ما يذبح ثعابينه
على قول المثل ماني حلو لكني ماني شين
إذا أهداك الزهر مره فأنا اهديتك بساتينه
و إذا ألهاك بفرح ليله فانا تهت لبكاك سنين
وإذا استضعفتك أملاكه و شتتك ملايينه
أنا حتى فتات الخبزة أقسمها معك نصين
طموحي بس أجي و أظفر بشي تستحقينه
تدينته تسلفته سرقته مو مهم منين
كأني من كثر ما ارضى بكل اللي تمنينه
لو انك تطلبين الله يعنيني بقول آمين
أنا ما العب على الحبلين وقت الطيش و سنينه
تبين الحين يوم أني كبرت العب على الحبلين
ترى عند البدو بالذات عيب اللي تسوينه
حلاتك لا عشقتي تعشقيني ليوم الدين
غرامٍ نسكن ضلوعه حشيمه من مجانينه
جفا يجمع معزتنا و لاعشق يذل أثنين
كثار اللي تحدوني و قالولي: تحبينه
امانه لاتخليني صغير بعينهم تكفين
لاني كل ما قالوا تخون اقول: مسكينه
عليك الله و أمانه علميهم منهو المسكين
أنا خايف لياطاح الجمل تكثر سكاكينه
وأنا ماعاد بضلوعي مكان لطعنة السكين
مثل ماقالوا المكتوب واضح من عناوينه
لو ارحل منك للغربه بسافر من ظلامك وين
كفايه كل حلم يمر برقادي تزورينه
كفاية من تفارقنا وأنا ما غمضت لي عين
قبل يومين شفتك بالمنام و قمت من حينه
و نمت أمس و أرجع نفس المنام اللي قبل يومين
حامد زيد
................................................................................
.............................
